இந்த முறையும் சிட்டுக்குருவி

இந்த முறையும்
சிட்டுக்குருவி
எனக்குள் கூடு கட்டியிருக்கிறது.

மின்விசிறியில் தொங்கிய அக்குருவி
டப்பென்று அறுந்து
தொப்பென்று
என் மார்பிலேயே விழுந்தது.

உள்ளங்களில் வழுக்கிய அக்குருவியை
உள்ளங்கையில் எடுத்தேன்
சித்தார்த்தனின் அன்னப் பறவை போல.
கைக்குள் உயிர்ப்பு அசைவு
இதயத்துள் தாறுமாறாக.

மூன்றாம் நாள்
உயிர்த்தெழுதல் நிகழும்.
காத்திருக்கிறேன்
சிட்டுக்குருவிக்காக
அது இட்டுச்சென்ற
முட்டைகளோடு.

முட்டைகளும் காத்திருக்கின்றன
சோணையில்.

சிட்டுக்குருவி
முட்டை
நான்
எழுப்பும் ஒலிகள் யாருக்குக் கேட்கும்?